చైనా అధ్యక్షుడి పర్యటనకు రంగం సిద్ధం? కీలక భేటీలో దోవల్

చైనా అధ్యక్షుడు షీ జిన్‌పింగ్ త్వరలో భారత్‌లో పర్యటించే అవకాశం ఉంది. దేశ రాజధాని ఢిల్లీ వేదికగా జరగనున్న బ్రిక్స్ (BRICS) సదస్సులో పాల్గొనేందుకు ఆయన సెప్టెంబరు 12, 13 తేదీల్లో ఇక్కడికి రానున్నట్లు తెలుస్తోంది. ఈ పర్యటన ఖరారైతే, దాదాపు ఏడేళ్ల సుదీర్ఘ విరామం తర్వాత జిన్‌పింగ్ భారత్‌లో అడుగుపెట్టినట్లు అవుతుంది. ఆయనతో పాటు చైనాకు చెందిన ఉన్నత స్థాయి ప్రతినిధి బృందం కూడా విచ్చేయనున్నట్లు సమాచారం.

మరోవైపు, భారత జాతీయ భద్రతా సలహాదారు (NSA) అజిత్ డోవల్ సోమవారం బీజింగ్‌కు చేరుకున్నారు. తన రెండు రోజుల పర్యటనలో భాగంగా, సరిహద్దు సమస్యలపై మంగళవారం జరగనున్న ప్రత్యేక ప్రతినిధుల సమావేశంలో ఆయన పాల్గొంటారు.

ఈ సందర్భంగా చైనా విదేశాంగ మంత్రి, జాతీయ భద్రతా సలహాదారు వాంగ్ యీతో కూడా అజిత్ డోవల్ భేటీ కానున్నారు. షీ జిన్‌పింగ్ భారత పర్యటనకు ముందు డోవల్ బీజింగ్‌కు వెళ్లడం అత్యంత ప్రాధాన్యత సంతరించుకుంది. సరిహద్దు వివాదాలపై కీలక చర్చలు జరగనుండటంతో ఈ పర్యటనపై సర్వత్రా ఆసక్తి నెలకొంది.